gustakhi maaf

dheemi si aahat ko shor samjha

neeli chandni ko bhor samjha

dhundhli fiza ko suroor samjha

halki si khwahish ko zid samjha

chhatpatati lau ko lapat samjha

bikharte moti ko chingari samjha

sikudi hui chadar ko chhaila samjha

daudti hui ghadi ko berukhi samjha

sarakte hue lamhe ko akela samjha

mehenge rishton ko aasaan samjha

bache kuche ko bharpoor samjha

doosre ki utaran ko rangeen samjha

nazuk tha mauka jise sulabh samjha

spashta tha bhaav jise gupt samjha

halka tha sanshay tumhe atal samjha

samajhna tha thoda kuchh zyada samjha

apni thi hatth jise saahas tha samjha

paana tha jisko usse hi daata samjha

gustaakhi maaf humne aapko apna samjha

alasya

jab khwaahish aise dhal gayi

har ichha jaise gal gayi

khud se shikayat badh gayi

jab niyat meri ghat gayi

sar chadh ke bola tha vo to

badh chadh badbola tha vo to

ab haq jo saare chhin gaye uske

man uska bhi jhoola tha ab to

man kehta chalta aur sahi

tan kehta thakta kabhi kabhi

zara kam hui jo yeh bheed kabhi

kehta hai bus ab aur nahi

dhikkar hai aisi jeet par

dhun yeh kiske geet par

khokhle ho jaate hain bol saare

jab naaz ho aalas ki neev par

kareeb...haan...shayad...

anginat khwaab bun raha tha kal raat

pal do pal mein lagi jaise kal ki baat

meine to aakhein abhi band bhi nahi ki thi

jo usne chhed di judaa hone ki baat

mein sehem gaya, jhijhak gaya

kuchh sochkar lekin thithak gaya

kahin paththar nahi tha main ho gaya

suni ansuni hoti rahi har baat

jaane kab se chhoot chuka tha hamara saath

iraade hi rahe na hue vo aatmsaat

na use aur shayad na hi mujhe

anjaan-ajnabi-ajeeb

wahi thake hue chehre hain

sehme hue kapdon mein

wahi bujhi hui si saansein hain

daudte hue dabbon mein

wahi bheegi hui aakhein hain

jhilmilate ishtehaaron mein

bus pheeke se tohfe hain

in rangeen lifaafon mein

kyun thehri hui si hai zindagi

iss phisalte hue samay mein

mere hi khyaal ki upaj hai shayad

ya meri aakhein michli hain shayad

par yeh chashma to naya hi liya tha

uss umang ki talaash mein hun

milegi agle mod par shayad

mein abhi zyada chala nahi shayad

pahuchunga uss mod par aaj nahi to kal

jhoom jaunga uske suroor mein shayad

banjar nahi lagega mujhe aur yeh sheher shayad

chhitkega apne bhi kuchh rang yeh mujh par

samet lega yeh mujhe bhi shayad

na anjaan na ajnabi hoga ab aur yeh sheher shayad

aas

yeh shaam kaisi jhoom ke

sard sard ga rahi,

teri yaad kaise ghoom ke

rooh mein sama rahi.

likha hai jiski soch se

yeh haal-e-waqt maine naya

bhara hai uske hosh mein

pyaala-o-kash dosti ka meine naya

har kali pe phool khil raha

taazi os se vo nam raha

pankhudi par giri boond sa

yeh qissa kaisa sambhal raha

bus ek hi cheez hai thehri hui

lagta hai susti behri hui

khurach khurach ke jo na nikle

ishq ki syaahi ye jam gayi

shafaq pe ghir ke badalon ne

hai guftagu ye chhed di

zameen ko mujhse ittefaaq kyun

tumne bheegne ki lat jo daal di

suna hai ab yeh dosti

rehti hai har pal taak mein

kaid hain iski khwahishein

phirti hai rihai ki firaaq mein

main jhoomta hun, ghoomta hun

iss madhoshi ko choomta hun

shaista hai meri taqdeer mujhse

paata tujhe jab bhi aankh kholta hun